Աշակերտական հաւաք Հայ Կաթողիկէ Պատրիարքարանի Նահատակաց Յուշակոթողին շուրջ

2016 Apr 12

Կազմակերպութեամբ «Զարթօնք» օրաթերթին, երկուշաբթի 11 ապրիլ 2016, առաւօտեան ժամը 10․00-ին,  Հայ կաթողիկէ Պատրիարքարանի Ապրիլեան Նահատակաց  յուշակոթողին շուրջ տեղի ունեցաւ աշակերտական հաւաք մը ի յիշատակ ազրպէյճանական բանակին կողմէ Արցախի վրայ սանձազերծուած բարբարոսային յարձակումին առաջին զոհերէն՝ 12 ամեայ Վաղինակ Գրիգորեանի նահատակութեան, իր յաճախած վարժարանին մօտ, եւ իբրեւ զօրակցութիւն ծանրօրէն վիրաւորուած իր եղբօր, Ղաղաբաղի իրենց սերնդակիցներուն եւ ամբողջ ժողովուրդին։

Աշակերտական հաւաքին, ներկայ էին կաթողիկէ Հայոց Պէյրութի թեմի օգնական եպիսկոպոս գերապայծառ հայր Գէորգ եպիսկոպոս Ասատուրեան,  Լիբանանի մօտ  Հայաստանի դեսպանատան ներկայացուցիչը, հայկական վարժարաններու տնօրէններ եւ լրագրողներ։

Հաւաքին բացումը կատարեց «Զարթօնք»ի պատասխանատու խմբագիր Սեւակ Յակոբեան։ Ապա յաջորդաբար խօսք առին (նաեւ արաբերէնով) դպրոցական պատուիրակութիւններու ներկայացուցիչներ: Հուսկ խօսք առնելով, արհիապատիւ Գէորգ եպիսկոպոս Ասատուրեան ըսաւ. «Հաւաքուած ենք մասնաւորաբար ոգեկոչելու համար յիշատակը Վաղինակ Գրիգորեանին եւ զօրակցելու համար Վաղինակի եղբօր Գէորգի, անոնց դասընկերոջ Վարդան Անդրէասեանի եւ Արցախի ձեր բոլոր տարեկիցներուն ու ժողովուրդին»։

Դուք անձամբ չէք ճանչնար անգամ նահատակ Վաղինակը եւ միւս զոհերը, բայց գիտէք ու կը զգաք թէ միեւնոյն Ազգի ու Հայրենիքի զաւակներն էք։ Դուք իրարու միացած էք արեամբ, պատմութեամբ, մկրտութեամբ, Լուսաւորչեան Հաւատքով, մեսրոպեան մշակոյթով, քաղաքակրթութեամբ,  եւ ձեր հայկական արմատներէն ձեզի փոխանցուած բազմաթիւ արժէքներով ու յատկանիշերով»։